ഇരിട്ടി: ആറളം പുഴകടന്ന് വീണ്ടും കാട്ടാനകള്‍ ജനവാസ കേന്ദ്രത്തിലേക്ക് എത്തിയതോടെ മുഴക്കുന്ന് പഞ്ചായത്തിലെ വിളക്കോട്, ചാക്കാട് മേഖലയിലുള്ളവർ ആശങ്കയിലായി.
വെള്ളിയാഴ്ച രാത്രിയും ശനിയാഴ്ച പുലർച്ചെയുമായാണ് ആറളം വന്യജീവി സങ്കേതത്തില്‍നിന്ന് കാട്ടാനകള്‍ വിളക്കോട്, ചാക്കാടിലെ ജനവാസ കേന്ദ്രത്തില്‍ എത്തിയത്. ഒരാഴ്ച മുമ്ബും പുഴകടന്ന് എത്തിയ ആനക്കൂട്ടം മേഖലയില്‍ കനത്ത കൃഷി നാശം വരുത്തിയിരുന്നു.
എടൂർ, മണത്തണ മലയോര ഹൈവേയുടെ പുഴയോടുചേർന്നുള്ള വീടിന്റെ പിന്നിലെത്തിയ ആനകള്‍ മതില്‍ തകർക്കുകയും കൃഷി നശിപ്പിക്കുകയും ചെയ്തിരുന്നു. ചാക്കാട് സ്വദേശി ദിനേശൻ, പെരുമ്ബറമ്ബ് സ്വദേശി സാവിത്രി എന്നിവരുടെ ഉടമസ്ഥതയിലുള്ള സ്ഥലത്തെ വാഴകളാണ് കാട്ടാനകള്‍ വ്യാപകമായി നശിപ്പിച്ചിട്ടുള്ളത്. വിവരമറിഞ്ഞെത്തിയ വനപാലകർ പ്രദേശത്ത് പരിശോധന നടത്തിയെങ്കിലും പുലർച്ചയോടെ കാട്ടാന തിരികെപുഴ കടന്ന് ഫാമിനുള്ളിലേക്ക് പ്രവേശിക്കുകയായിരുന്നു.
ആറളം വനത്തില്‍നിന്ന് ആറളം ഫാമിന്റെ കൃഷിയിടത്തില്‍ താവളമാക്കിയ ആനകളും പുഴകടന്ന് അയ്യപ്പൻക്കാവ്, ചാക്കാട്, പാലപ്പുഴ ഭാഗങ്ങളില്‍ എത്തുന്നുണ്ട്. മേഖലയില്‍ കാട്ടാന ശല്യം രൂക്ഷമായതോടെ നാട്ടുകാർ പിരിവെടുത്ത് പുഴാതിർത്തിയില്‍ തൂക്കുവേലി സ്ഥാപിച്ചിരുന്നു. ഏറെക്കാലം ആനശല്യത്തിന് പരിഹാരം ഉണ്ടായെങ്കിലും തകർന്ന തൂക്കുവേലി പൂർവ സ്ഥിതിയിലാക്കാനുള്ള നടപടികളുണ്ടായിട്ടില്ല.
പാലപ്പുഴ കൂടലാട് ഭാഗത്ത് കഴിഞ്ഞ വെള്ളപ്പൊക്കത്തില്‍ കൂറ്റൻ മരം ഒഴുകിവന്ന് തൂക്കുവേലി തകർത്തതാണ് ആനകള്‍ വീണ്ടും ജനവാസ മേഖലയിലേക്ക് കടക്കുന്നതിന് കാരണമാകുന്നത്. ഇത് പുനസ്ഥാപിക്കണമെന്ന് നാട്ടുകാർ പലതവണ വനം വകുപ്പിനോട് ആവശ്യപ്പെട്ടിട്ടും നടപടിയുണ്ടായിട്ടില്ലെന്നാണ് പ്രദേശവാസികള്‍ പറയുന്നത്. കഴിഞ്ഞ വർഷം പുഴകടന്ന് എത്തിയ ആനകള്‍ പാലപ്പുഴയും കടന്ന് മുഴക്കുന്ന് പഞ്ചായത്തിലെ ജനങ്ങള്‍ തീങ്ങിപ്പാർക്കുന്ന ഇടങ്ങളിലേക്ക് കയറിയത് വലിയ ആശങ്കയുണ്ടാക്കിയിരുന്നു
ഫാമില്‍ ഭക്ഷണത്തിന് ക്ഷാമം നേരിടുമ്ബോഴാണ് ആനക്കൂട്ടം പുഴകടന്ന് ജനവാസ മേഖലയിലേക്ക് പ്രവേശിക്കുന്നത്. ഫാമിനുള്ളിലെ ആനകളെ പൂർണമായും തുരത്താൻ ഇതുവരെ കഴിഞ്ഞിട്ടില്ല. ഫാമിലെ വിവിധ ബ്ലോക്കുകളെ തമ്മില്‍ ബന്ധിപ്പിച്ച്‌ സ്ഥാപിച്ച തൂക്കുവേലി കാരണം നിലവില്‍ തമ്ബടിച്ച മേഖലയില്‍നിന്ന് ഫാമിന്റെ മറ്റ് ഭാഗങ്ങളിലേക്ക് പോകാനും പറ്റുന്നില്ല. ഇതാണ് ആനകള്‍ പുഴകടന്ന് വരാനുള്ള പ്രധാന കാരണം.
إرسال تعليق