നീറ്റ് ചോദ്യപേപ്പർ ചോർന്ന കേസിൽ സിബിഐ അന്വേഷണ സംഘത്തിന് നിര്‍ണായക തെളിവ് നല്‍കി ബീഹാർ പൊലീസ്. 200 നീറ്റ് ചോദ്യപേപ്പറുകൾ കത്തിച്ചതായി പൊലീസ് നൽകിയ തെളിവുകളിൽ പറയുന്നു. ഈ കണ്ടെത്തിയ ചോദ്യപേപ്പറുകളിൽ നിന്നും 68 എണ്ണം അവശിഷ്ടങ്ങളിൽ നിന്ന് വീണ്ടെടുത്തതായി ബീഹാർ പൊലീസ് പറയുന്നു.
ജാര്‍ഖണ്ഡിലെ ഒയാസിസ് സ്കൂള്‍ കേന്ദ്രത്തിലെ ചോദ്യ പേപ്പറുകളാണ് ചോര്‍ന്നതെന്നാണ് സ്ഥിരീകരണം. കത്തിച്ച പേപ്പറുകളിലെ ചോദ്യങ്ങൾ യഥാർത്ഥ പേപ്പറുമായി യോജിക്കുന്നത്. ഇതുസംബന്ധിച്ച തെളിവുകളാണ് ബീഹാർ പൊലീസ് സിബിഐക്ക് കൈമാറിയത്. ബിഹാറിൽ അറസ്റ്റിലായ വ്യക്തി 30 വിദ്യാർത്ഥികൾക്ക് ചോദ്യപേപ്പർ നൽകിയെന്നും കണ്ടെത്തിയിട്ടുണ്ട്. 68 ചോദ്യങ്ങൾ ഒറിജിനലിന് സമാനമാണെന്നും കത്തിച്ച സ്ക്രാപ്പുകളിലെയും ഒറിജിനൽ പേപ്പറിലെയും ഈ ചോദ്യങ്ങളുടെ സീരിയൽ നമ്പറുകളും സമാനമാണെന്നും പൊലീസ് പറഞ്ഞു.
ജാർഖണ്ഡിലെ ഹസാരിബാഗിലെ എൻടിഎയുടെ നിയുക്ത പരീക്ഷാ കേന്ദ്രമായിരുന്ന സിബിഎസ്ഇ-അഫിലിയേറ്റ് ചെയ്ത സ്വകാര്യ സ്കൂളായ ഒയാസിസ് സ്കൂൾ. കത്തിച്ച അവശിഷ്ടങ്ങൾ യഥാർത്ഥ പേപ്പറും അതിലെ ചോദ്യങ്ങളുമായി പൊരുത്തപ്പെടുത്താൻ ഇ ഓ യു ഫോറൻസിക് ലബോറട്ടറിയുടെ സഹായം സ്വീകരിച്ചു. ഈ റിപ്പോർട്ടിൻ്റെ അടിസ്ഥാനത്തിലാണ് അന്വേഷണം സിബിഐക്ക് കൈമാറാൻ വിദ്യാഭ്യാസ മന്ത്രാലയം ശനിയാഴ്ച തീരുമാനിച്ചത്.
കേസിൽ അറസ്റ്റിലായ ഉദ്യോഗാർത്ഥികൾ താമസിച്ചിരുന്ന വീട്ടിൽ നിന്നാണ് ബീഹാർ പോലീസ് കത്തിച്ച ചോദ്യ പേപ്പറിൻ്റെ അവശിഷ്ടങ്ങൾ കണ്ടെടുക്കുന്നത്. പിടിച്ചെടുത്ത പേപ്പറുകളിൽ ഒരു സ്‌കൂളിൻ്റെ പരീക്ഷാ കേന്ദ്ര കോഡും കണ്ടെത്തിയിരുന്നു. ചോദ്യപേപ്പർ ചോർച്ചയുമായി ബന്ധപ്പെട്ട് അറസ്റ്റിലായവരുടെ ആകെ എണ്ണം 18 ആയി. ഇന്നലെ അഞ്ച് പ്രതികളെ കൂടി ഇ ഓ യു അറസ്റ്റ് ചെയ്തിരുന്നു.
إرسال تعليق