വിവാഹവീട്ടിൽ ഭീകരാന്തരീക്ഷം, വാളുമായെത്തിയ ​ഗുണ്ടകൾ വീട്ടുകാരെ ആക്രമിച്ച് വധുവിനെ കടത്താന്‍ ശ്രമിച്ചു

ഭോപ്പാൽ: മധ്യപ്രദേശിലെ അശോക് നഗറിൽ 22 കാരിയായ യുവതിയെ വിവാഹത്തിനിടെ തട്ടിക്കൊണ്ടുപോകാൻ ശ്രമം. പ്രധാന പ്രതിയായ കാലു എന്ന സലിം ഖാൻ മുമ്പ് യുവതിയെ ബലാത്സംഗം ചെയ്യുകയും വീഡിയോ ഉപയോഗിച്ച് അപകീർത്തിപ്പെടുത്തുകയും ചെയ്തിരുന്നു. പിന്നീട് മറ്റൊരു പുരുഷനെ വിവാഹം നടക്കുമ്പോഴാണ് യുവതിയെയും വീട്ടുകാരെയും ആക്രമിച്ചത്. കഴിഞ്ഞ ദിവസം 

വൈകുന്നേരം 6 മണിയോടെ കാലു കൂട്ടാളികളായ ജോധ, സമീർ, ഷാരൂഖ് എന്നിവർക്കൊപ്പം യുവതിയുടെ വീട് അടിച്ചുതകർത്തു. കുടുംബത്തെ ആക്രമിക്കുകയും പിതാവിൻ്റെ കാലും സഹോദരൻ്റെ കൈയും തല്ലി ഒടിക്കുകയും ചെയ്തു.

അമ്മയ്ക്കും ക്രൂരമായ മർദനമേറ്റു. വാളുകളും ഇരുമ്പ് വടികളും വീശി അക്രമികൾ യുവതിയെ വീട്ടിൽ നിന്ന് വലിച്ചിറക്കി. വീട്ടുകാരും സ്ത്രീയും സഹായത്തിനായി നിലവിളിച്ചതോടെ ജനക്കൂട്ടം തടിച്ചുകൂടി. പ്രതികൾ നാട്ടുകാരെ ഭീഷണിപ്പെടുത്തിയെങ്കിലും ആൾക്കൂട്ടം വർധിച്ചതോടെ യുവതിയെ ഉപേക്ഷിച്ച് ഓടി രക്ഷപ്പെട്ടു.

പ്രതികൾ സ്ത്രീയുടെയും വരന്റെയും കുടുംബത്തെ ഭീഷണിപ്പെടുത്തി. കേസെടുക്കാൻ പൊലീസ് ആദ്യം തയ്യാറായില്ലെങ്കിലും നാട്ടുകാരുടെ ഇടപെടലിനെ തുടർന്ന് യുവതിയുടെയും പിതാവിൻ്റെയും പരാതിയുടെ അടിസ്ഥാനത്തിൽ കേസെടുത്തു.