പ്രതികളെ കീഴ്പ്പെടുത്തിയത് അതിസാഹസികമായി
എടക്കാട് ഭാസ്കരൻ പീടികക്ക് സമീപം പൊലീസിനുനേരെ ബീയര്‍കുപ്പി എറിയുകയും വടിവാള്‍ വീശുകയും ചെയ്ത സംഘത്തെ പിടികൂടാനായി ബിനു മോഹന്റെ നേതൃത്വത്തില്‍ പ്രത്യേക അന്വേഷണ സംഘത്തെ രൂപവത്കരിച്ചിരുന്നു. പൊലീസിനെ ആക്രമിച്ച ശേഷം കര്‍ണാടകയിലേക്ക് കടന്ന സംഘത്തിന്റെ പിന്നാലെയായിരുന്നു പൊലീസ്. പ്രതികള്‍ പയ്യന്നൂരില്‍ എത്തിയ വിവരം ലഭിച്ചതിനെ തുടര്‍ന്നാണ് ശനിയാഴ്ച അന്വേഷണസംഘം സ്ഥലത്തെത്തിയത്. പുലര്‍ച്ച മൂന്നോടെ ലോഡ്ജില്‍ പൊലീസ് എത്തിയതോടെ അക്രമാസക്തരായ പ്രതികളെ അതിസാഹസികമായാണ് കീഴ്പ്പെടുത്തിയത്. ഏറ്റുമുട്ടലില്‍ പൊലീസുകാര്‍ക്ക് പരിക്കേറ്റിട്ടുണ്ട്.
സംശയാസ്പദമായ രീതിയില്‍ കണ്ട കാറിനെ പിന്തുടര്‍ന്ന എടക്കാട് പൊലീസിനുനേരെ ജനുവരി എട്ടിന് പുലര്‍ച്ചെയാണ് ആക്രമണമുണ്ടായത്. പൊലീസ് വാഹനത്തിനുനേരെ ബീര്‍കുപ്പിയെറിഞ്ഞ സംഘം വടിവാളും വീശി. സംഭവത്തില്‍ പൊലീസ് ജീപ്പിന്റെ ചില്ലുപൊട്ടുകയും സീനിയര്‍ സിവില്‍ പൊലീസ് ഉദ്യോഗസ്ഥന് പരിക്കേല്‍ക്കുകയും ചെയ്തിരുന്നു.
ആക്രമികള്‍ സഞ്ചരിച്ച കാറിനെ മറികടക്കാൻ ശ്രമിക്കുന്നതിനിടെയാണ് പൊലീസ് വാഹനത്തിന് നേരെ വടിവാള്‍ വീശിയത്. നിയന്ത്രണം നഷ്ടമായതിനെ തുടര്‍ന്ന് പൊലീസ് ജീപ്പ് റോഡരികിലേക്ക് വെട്ടിക്കുകയായിരുന്നു. ഈ സമയം ആക്രമികള്‍ രക്ഷപ്പെട്ടു. കര്‍ണാടക രജിസ്ട്രേഷൻ കാറില്‍ നാലുപേരുണ്ടായിരുന്നു. എടക്കാട് പൊലീസ് സ്റ്റേഷനിലെ ലഹരിക്കേസിലെ പ്രതിയായ അബ്ദുല്‍ റഹീം സംഘത്തിലുണ്ടായിരുന്നതായി പൊലീസിന് വിവരം ലഭിച്ചതാണ് സംഭവത്തില്‍ തുമ്ബായത് 12 പേരടങ്ങുന്ന പ്രത്യേക അന്വേഷണ സംഘം രൂപവത്കരിച്ചായിരുന്നു അന്വേഷണം. പൊലീസിനെ ആക്രമിച്ച കേസിലെ പ്രതികളായ നാലുപേര്‍ അടക്കം ആറുപേരെ ഒരാഴ്ചക്കുള്ളില്‍ പിടികൂടാനായത് നേട്ടമായി. ലോഡ്ജില്‍ പിടിയിലായ മറ്റുരണ്ടുപേര്‍ക്ക് പ്രതികളുമായുള്ള ബന്ധം അന്വേഷിച്ചുവരുകയാണ്.
Post a Comment