പാനൂര്‍ വള്ള്യായിയിലെ വിഷ്ണുപ്രിയ കൊലക്കേസില്‍ വ്യാഴാഴ്ച തലശ്ശേരി കോടതിയില്‍ വിചാരണ ആരംഭിക്കും.
പാനൂര്‍ വള്ള്യായിയിലെ കണ്ണച്ചൻകണ്ടി വീട്ടില്‍ വിനോദന്റെ മകളാണ് കൊല്ലപ്പെട്ട വിഷ്ണുപ്രിയ (23). 2022 ഒക്ടോബര്‍ 22ന് ഉച്ചക്ക് 12 മണിയോടെയാണ് വീട്ടിലെ കിടപ്പു മുറിയില്‍ വിഷ്ണുപ്രിയ കൊലചെയ്യപ്പെട്ടത്.
വിഷ്ണുപ്രിയയുടെ ആണ്‍സുഹൃത്തായിരുന്ന കൂത്തുപറമ്ബിനടുത്ത മാനന്തേരിയിലെ താഴെകളത്തില്‍ ശശിധരന്റെ മകൻ എ. ശ്യാംജിത്താണ് (25) കേസിലെ പ്രതി. സംഭവത്തിനു ശേഷം പിടിയിലായ ഇയാള്‍ ജയിലിലാണ്. സംഭവദിവസം രാവിലെ വിഷ്ണുപ്രിയയും കുടുംബവും മരിച്ച അടുത്ത ബന്ധുവിന്റെ വീട്ടില്‍ പോയതായിരുന്നു. കുറച്ചു കഴിഞ്ഞ് വിഷ്ണുപ്രിയ മാത്രം തിരികെ സ്വന്തം വീട്ടിലെത്തി.
ഈ സമയം മറ്റൊരു ആണ്‍സുഹൃത്തായിരുന്ന പൊന്നാനി പനമ്ബാടിയിലെ വിപിൻ രാജുമായി വീഡിയോ കാള്‍ വഴി സംസാരിച്ചു കൊണ്ടിരിക്കെ ബൈക്കില്‍ എത്തിയ ശ്യാംജിത്ത് വീട്ടില്‍ അതിക്രമിച്ചു കടന്ന് വിഷ്ണുപ്രിയയെ കുത്തിക്കൊലപ്പെടുത്തിയെന്നാണ് കേസ്. പാനൂരിലെ സ്വകാര്യ ആശുപത്രിയില്‍ ഫാര്‍മസിസ്റ്റായി ജോലി ചെയ്യുകയായിരുന്നു വിഷ്ണുപ്രിയ. ബന്ധുവായ കല്യാണി നിലയത്തില്‍ കെ. വിജയന്റെ പരാതിയിലാണ് പൊലീസ് പ്രഥമവിവരം രേഖപ്പെടുത്തിയത്. ഇദ്ദേഹമാണ് കേസില്‍ ഒന്നാം സാക്ഷി.
Post a Comment