സംസ്ഥാനത്ത് റേഷൻ വ്യാപാരികൾ പ്രഖ്യാപിച്ച അനിശ്ചിതകാല സമരം ഇന്നുമുതൽ. വേതനപരിഷ്‌കരണവും മറ്റ് ആനുകൂല്യങ്ങളുമാണ് വ്യാപാരികളുടെ പ്രധാന ആവശ്യം. ഭക്ഷ്യ- ധന മന്ത്രിമാരായ ജിആർ അനിൽ, കെഎൻ ബാലഗോപാൽ എന്നിവർ സംഘടാന പ്രതിനിധികളുമായി വെള്ളിയാഴ്ച ചർച്ചനടത്തിയെങ്കിലും വിജയിച്ചിരുന്നില്ല. വേതനപരിഷ്‌കരണമെന്ന വ്യാപാരികളുടെ ആവശ്യത്തിൽ കൃത്യമായ ഉറപ്പു ലഭിക്കാതിരുന്നതോടെയാണ് ചർച്ച അലസിയത്.
2018 നു ശേഷം കമ്മിഷനും വേതനവും പരിഷ്കരിച്ചിട്ടില്ലെന്നും സർക്കാർ പലഘട്ടങ്ങളിലായി നൽകിയ ഉറപ്പുകൾ പാലിച്ചില്ലെന്നും വ്യാപാരി സംഘടനകൾ പറയുന്നു. അതേസമയം സമരം നേരിടാൻ കർശന നടപടികളുമായി മുന്നോട്ടുപോകാനാണ് സർക്കാർ തീരുമാനം. അടച്ചിടുന്ന കടകൾ ഏറ്റെടുക്കുമെന്ന് ഭക്ഷ്യമന്ത്രി ജിആർ അനിൽ അറിയിച്ചു. ചൊവ്വാഴ്ച മുതൽ സഞ്ചരിക്കുന്ന റേഷൻ കടകൾ നിരത്തിലിറക്കുമെന്നും മന്ത്രി കൂട്ടിച്ചേർത്തു. വ്യാപാരികൾ കട തുറക്കുമെന്നാണ് പ്രതീക്ഷയെന്നും മന്ത്രി വ്യക്തമാക്കി.
അതേസമയം റേഷൻകടയുടമകളുടെ സമരം കാരണം ഭക്ഷ്യധാന്യവിതരണം തടസപ്പെട്ടാൽ നിയമനടപടിയെടുക്കുമെന്ന് സംസ്ഥാന ഭക്ഷ്യ കമ്മിഷൻ മുന്നറിയിപ്പ് നൽകിയിട്ടുണ്ട്. 2013ലെ ദേശീയ ഭക്ഷ്യഭദ്രതാ നിയമപ്രകാരം ഭക്ഷ്യാവകാശങ്ങൾ പൊതുവിതരണ സമ്പ്രദായത്തിലൂടെ ലഭ്യമാകുന്നുവെന്ന് ഉറപ്പുവരുത്തേണ്ടത് സംസ്ഥാന ഭക്ഷ്യകമ്മിഷന്റെ ചുമതലയാണ്.
ജനുവരി തുടക്കം മുതൽ റേഷൻകടകളിൽ സാധനങ്ങൾ എത്തിക്കുന്ന ലോറിയുടമകൾ സമരത്തിലായതോടെ ഭക്ഷ്യധാന്യവിതരണം മുടങ്ങിയിരുന്നു. ഇതിനുപുറമേയാണ് വേതനപരിഷ്‌കരണം ആവശ്യപ്പെട്ട് കടയുടമകളും സമരം പ്രഖ്യാപിച്ചത്. ഇതിനിടെ റേഷൻ കടകളിൽ സാധനമെത്തിക്കുന്ന കരാറുകാർ 24 ദിവസമായി നടത്തിവന്ന സമരം കഴിഞ്ഞ ദിവസം പിൻവലിച്ചിരുന്നു. മന്ത്രി ജിആർ അനിൽ സംഘടനനേതാക്കളുമായി നടത്തിയ ചർച്ചയുടെ അടിസ്ഥാനത്തിലാണിത്.
Post a Comment