സൗദി ജയിലില്‍ കഴിയുന്ന കോഴിക്കോട് സ്വദേശി അബ്ദുല്‍ റഹീമിനെ സന്ദര്‍ശിച്ച് മാതാവ് ഫാത്തിമ. 18 വര്‍ഷങ്ങള്‍ക്ക് ശേഷം ഇതാദ്യമായാണ് ഫാത്തിമ മകന്‍ അബ്ദുല്‍ റഹീമിനെ നേരില്‍ കാണുന്നത്. ഉംറ നിര്‍വഹിച്ച ശേഷം തിരിച്ച് റിയാദിലെത്തിയ ഫാത്തിമ റിയാദ് അല്‍ഖര്‍ജ് റോഡിലെ അല്‍ ഇസ്‌ക്കാന്‍ ജയിലില്‍ എത്തിയാണ് റഹീമിനെ സന്ദര്‍ശിച്ചത്.
മാതാവും ബന്ധുക്കളും കഴിഞ്ഞ ദിവസം സൗദിയിലെത്തിയെങ്കിലും ഇവരെ കാണാന്‍ റഹീം കൂട്ടാക്കിയിരുന്നില്ല. മാതാവിനെ ജയിലിനുള്ളില്‍ വച്ച് കാണാന്‍ തനിക്ക് മനസ് അനുവദിക്കുന്നില്ലെന്നായിരുന്നു റഹീമിന്റെ പ്രതികരണം. മാതാവ് ഫാത്തിമ, സഹോദരന്‍, അമ്മാവന്‍ എന്നിവരാണ് റഹീമിനെ കാണാന്‍ ജയിലിലെത്തിയത്.
മാതാവ് തന്നെ സന്ദര്‍ശിക്കാനെത്തിയെന്ന് അറിഞ്ഞപ്പോള്‍ തന്നെ രക്തസമ്മര്‍ദ്ദം വര്‍ദ്ധിക്കുന്നതിന്റെ ലക്ഷണങ്ങളുണ്ടായിരുന്നു. പിന്നാലെ മരുന്ന് കഴിച്ചു. ഉമ്മയുടെ മനസില്‍ ഇന്നും 18 വര്‍ഷം മുമ്പ് സൗദിയിലേക്ക് തിരിച്ചപ്പോഴുള്ള മകന്റെ മുഖമാണ്. അത് അങ്ങനെ തന്നെ ഉണ്ടാവട്ടെ എന്നാണ് ആഗ്രഹിക്കുന്നതെന്ന് റഹീം അന്ന് സുഹൃത്തുക്കളോട് ഫോണില്‍ പറഞ്ഞത്.
Post a Comment