അപകീര്ത്തി കേസുമായി ബന്ധപ്പെട്ട് കോണ്ഗ്രസ് നേതാവ് രാഹുല് ഗാന്ധി നല്കിയ അപ്പീല് സുപ്രീം കോടതി ഇന്ന് പരിഗണിക്കും. ശിക്ഷാവിധി ശരിവെച്ച ഗുജറാത്ത് ഹൈക്കോടതി വിധി സ്റ്റേ ചെയ്യണമെന്നാവശ്യപ്പെട്ടാണ് രാഹുലിന്റെ അപ്പീൽ. ജൂലൈ 15നാണ് രാഹുല് ഗാന്ധി സുപ്രീം കോടതിയില് അപ്പീല് നല്കിയത്.
രാഹുല് മാപ്പ് പറയാന് തയ്യാറായില്ലെന്നും അഹങ്കാരിയാണെന്നും ചൂണ്ടിക്കാണിച്ച് പരാതിക്കാരനായ ബിജെപി എംഎല്എ പൂര്ണേഷ് മോദി എതിര് സത്യവാങ്മൂലം നല്കിയയിട്ടുണ്ട്. എന്നാൽ മാപ്പ് പറയില്ലെന്നാണ് രാഹുൽ മറുപടി സത്യവാങ്മൂലം സമർപ്പിച്ചത്.
2019 ല് കര്ണാടകയിലെ കോലാറില് നടന്ന പ്രസംഗത്തിലെ മോദി പ്രയോഗത്തിലാണ് പൂര്ണേഷ് മോദി ഗുജറാത്തിലെ സൂറത്തില് രാഹുലിനെതിരെ അപകീര്ത്തിക്കേസ് നല്കിയത്. മാപ്പ് പറയില്ലെന്നും മാപ്പുപറയാന് താന് സവര്ക്കറല്ലെന്നും രാഹുല് പറഞ്ഞിരുന്നു.
ഗുജറാത്തില് നിന്നുള്ള എംഎല്എയായ പൂര്ണേഷ് മോദി നല്കിയ അപകീര്ത്തി കേസില് സൂറത്ത് സെഷന്സ് കോടതി രാഹുലിന് രണ്ട് വര്ഷത്തേക്ക് തടവ് ശിക്ഷ വിധിച്ചിരുന്നു. ഈ വിധി വന്നതോടെ രാഹുലിനെ എംപി സ്ഥാനത്തുനിന്ന് അയോഗ്യനാക്കുകയും ചെയ്തു. പിന്നാലെയാണ് രാഹുല് ഹൈക്കോടതിയെ സമീപിച്ചത്.ഹര്ജി പരിഗണിക്കാന് തയ്യാറാകാതെ ഹൈക്കോടതി തള്ളി. ഇതോടെയാണ് സുപ്രീം കോടതിയെ സമീപിച്ചത്.
Post a Comment